teri yaadon ne kabhi chain se jine na diya

terī yādoñ ne kabhī chain se jiine na diyā

maiñ ne chāhā to mujhe zahr bhī piine na diyā

yuuñ hī ban ban ke bigaḌte rahe ā.īn-e-vafā

be-sahāroñ ko sahārā to kisī ne na diyā

ġham to ġham josh-e-masarrat ne baḌhāyā vo junūñ

chāk-e-dāmāñ kisī unvān bhī siine na diyā

zindagī ġham se sañvartī hai ye maanā lekin

manzil-e-ġham meñ sahārā to kisī ne na diyā

aaj kyuuñ aa ga.e tum dard kā darmāñ ban kar

jām-e-furqat bhī mujhe chain se piine na diyā

tere milne kī ḳhushī tere bichhaḌne kā malāl

ġhamza-e-shām-o-sahar ne hameñ jiine na diyā

kis se shikva kareñ vīrānī-e-hastī kā 'hayāt'

ham ne ḳhud apnī tamannāoñ ko jiine na diyā

teri yaadon ne kabhi chain se jine na diya

main ne chaha to mujhe zahr bhi pine na diya

yun hi ban ban ke bigaDte rahe aain-e-wafa

be-sahaaron ko sahaara to kisi ne na diya

gham to gham josh-e-masarrat ne baDhaya wo junun

chaak-e-daman kisi unwan bhi sine na diya

zindagi gham se sanwarti hai ye mana lekin

manzil-e-gham mein sahaara to kisi ne na diya

aaj kyun aa gae tum dard ka darman ban kar

jam-e-furqat bhi mujhe chain se pine na diya

tere milne ki KHushi tere bichhaDne ka malal

ghamza-e-sham-o-sahar ne hamein jine na diya

kis se shikwa karen virani-e-hasti ka 'hayat'

hum ne KHud apni tamannaon ko jine na diya