teri ye zulfen nahin tere ruKH-e-raushan ke pas

terī ye zulfeñ nahīñ tere ruḳh-e-raushan ke paas

abr ke do TukḌe uTh kar aa.e haiñ gulshan ke paas

kyuuñ zamīñ hilne lagī hai kyuuñ pareshāñ ruuh hai

kaun ghabrā ke chalā aayā mire madfan ke paas

khīñchnā jazb-e-mohabbat us kā dāman dekh kar

sar-nigūñ baiThā na ho fitna koī dāman ke paas

phir to DhūñDā bhī nahīñ miltā koī murġh-e-chaman

ghar agar sayyād kā hotā kisī gulshan ke paas

kaun detā hai hamāre dil ko ye tarġhīb-e-nek

rahnumā baiThā huā hai kyā koī rahzan ke paas

maiñ to samjhā thā ki ab chhūTā ġham-o-ālām se

teġh us kī ruk ga.ī aa kar mirī gardan ke paas

bazm-e-dushman meñ nayā fitna koī uThne ko thā

ḳhair guzrī aap aa baiThe qayāmat ban ke paas

'shād' ab dil kā tumhāre haath aanā hai muhāl

vo magan baiThā huā hogā kisī pur-fan ke paas

teri ye zulfen nahin tere ruKH-e-raushan ke pas

abr ke do TukDe uTh kar aae hain gulshan ke pas

kyun zamin hilne lagi hai kyun pareshan ruh hai

kaun ghabra ke chala aaya mere madfan ke pas

khinchna jazb-e-mohabbat us ka daman dekh kar

sar-nigun baiTha na ho fitna koi daman ke pas

phir to DhunDa bhi nahin milta koi murgh-e-chaman

ghar agar sayyaad ka hota kisi gulshan ke pas

kaun deta hai hamare dil ko ye targhib-e-nek

rahnuma baiTha hua hai kya koi rahzan ke pas

main to samjha tha ki ab chhuTa gham-o-alam se

tegh us ki ruk gai aa kar meri gardan ke pas

bazm-e-dushman mein naya fitna koi uThne ko tha

KHair guzri aap aa baiThe qayamat ban ke pas

'shad' ab dil ka tumhaare hath aana hai muhaal

wo magan baiTha hua hoga kisi pur-fan ke pas