teri zamin ki KHak mein mil kar chale gae

terī zamīñ kī ḳhaak meñ mil kar chale ga.e

jaane yahāñ se kitne sikandar chale ga.e

māyūsiyāñ simaT ke nazar meñ samā ga.iiñ

jab tum mirī nigāh se bāhar chale ga.e

sharminda-e-nazar the nazar kyā milāte vo

kuchh log apne sar ko jhukā kar chale ga.e

sochā thā ham ne saath guzāreñge zindagī

tum to hamārī soch badal kar chale ga.e

ḳhanjar kā ghaav jism ke bāhar banā rahā

alfāz tere dil ke bhī andar chale ga.e

achchhī lagī mujhe ki burī un ko kyā ġharaz

jo baat un ke dil meñ thī kah kar chale ga.e

TuuTī huī thī naav kināra qarīb thā

tūfān apnā ro.ab dikhā kar chale ga.e

teri zamin ki KHak mein mil kar chale gae

jaane yahan se kitne sikandar chale gae

mayusiyan simaT ke nazar mein sama gain

jab tum meri nigah se bahar chale gae

sharminda-e-nazar the nazar kya milate wo

kuchh log apne sar ko jhuka kar chale gae

socha tha hum ne sath guzarenge zindagi

tum to hamari soch badal kar chale gae

KHanjar ka ghaw jism ke bahar bana raha

alfaz tere dil ke bhi andar chale gae

achchhi lagi mujhe ki buri un ko kya gharaz

jo baat un ke dil mein thi kah kar chale gae

TuTi hui thi naw kinara qarib tha

tufan apna roab dikha kar chale gae