teri zulfen ghair agar suljhaega

terī zulfeñ ġhair agar suljhā.egā

aañkh vāloñ se na dekhā jā.egā

sab tarah kī saḳhtiyāñ sah jā.egā

kyuuñ dilā tū bhī kabhī kaam aa.egā

ek din aisā bhī nāseh aa.egā

ġham ko maiñ aur ġham mujhe khā jā.egā

ai falak aisā bhī ik din aa.egā

jab kiye par apne tū pachhtā.egā

vasl meñ dhaḌkā hai nāhaq hijr kā

vo din ā.eñge tujhe samjhā.egā

aa chuke ahbāb uThāne merī laash

naaz us ko dekhiye kab lā.egā

choT khaa.e dil kā mātam-dār hai

merā naala bhī taḌaptā jā.egā

chhoḌ de ham vahshiyoñ ko ai ġhubār

pīchhe pīchhe tū kahāñ tak aa.egā

muntazir hai jān-e-bar-lab-āmada

dekhiye kab phir ke qāsid aa.egā

hijr meñ naale ġhanīmat jaan le

phir to ḳhud ai zof tū pachhtā.egā

nīm-kushta haiñ to haiñ phir kyā kareñ

kuchh agar boleñ to vo sharmā.egā

josh-e-vahshat tujh pe sadqe apnī jaan

kaun talve is tarah sahlā.egā

aur bhī taḌpā diyā ġham-ḳhvār ne

ḳhud hai vahshī kyā mujhe bahalā.egā

rāh-rau tujh sā kahāñ ai ḳhizr-e-shauq

kaun terī ḳhāk-e-pā ko pā.egā

baaġh meñ kyā jaa.eñ aatī hai ḳhizāñ

gul kā utrā muñh na dekhā jā.egā

merī jaañ maiñ kyā karūñgā kuchh batā

jab tasavvur raat bhar taḌpā.egā

kyuuñ na maiñ mushtāq nāseh kā rahūñ

naam terā us ke lab par aa.egā

dil ke hāthoñ ruuh agar ghabrā ga.ī

kaun us vahshī ko phir bahalā.egā

kho ga.e haiñ donoñ jānib ke sire

kaun dil kī gutthiyāñ suljhā.egā

maiñ kahāñ vaa.iz kahāñ tauba karo

jo na samjhā ḳhud vo kyā samjhā.egā

thak ke āḳhir baiTh jā.egā ġhubār

kārvāñ muñh dekh kar rah jā.egā

dil ke hāthoñ se jo ghabrāoge 'shād'

kaun is vahshī ko phir samjhā.egā

kam na samjho shauq ko ai 'shād' tum

ik na ik baḌh ke ye aafat lā.egā

hai ḳhizāñ gul-gasht ko jaao na 'shād'

girya-e-shabnam na dekhā jā.egā

kuchh na kahnā 'shād' se hāl-e-ḳhizāñ

is ḳhabar ko sunte hī mar jā.egā

teri zulfen ghair agar suljhaega

aankh walon se na dekha jaega

sab tarah ki saKHtiyan sah jaega

kyun dila tu bhi kabhi kaam aaega

ek din aisa bhi naseh aaega

gham ko main aur gham mujhe kha jaega

ai falak aisa bhi ek din aaega

jab kiye par apne tu pachhtaega

wasl mein dhaDka hai nahaq hijr ka

wo din aaenge tujhe samjhaega

aa chuke ahbab uThane meri lash

naz us ko dekhiye kab laega

choT khae dil ka matam-dar hai

mera nala bhi taDapta jaega

chhoD de hum wahshiyon ko ai ghubar

pichhe pichhe tu kahan tak aaega

muntazir hai jaan-e-bar-lab-amada

dekhiye kab phir ke qasid aaega

hijr mein nale ghanimat jaan le

phir to KHud ai zof tu pachhtaega

nim-kushta hain to hain phir kya karen

kuchh agar bolen to wo sharmaega

josh-e-wahshat tujh pe sadqe apni jaan

kaun talwe is tarah sahlaega

aur bhi taDpa diya gham-KHwar ne

KHud hai wahshi kya mujhe bahalaega

rah-rau tujh sa kahan ai KHizr-e-shauq

kaun teri KHak-e-pa ko paega

bagh mein kya jaen aati hai KHizan

gul ka utra munh na dekha jaega

meri jaan main kya karunga kuchh bata

jab tasawwur raat bhar taDpaega

kyun na main mushtaq naseh ka rahun

nam tera us ke lab par aaega

dil ke hathon ruh agar ghabra gai

kaun us wahshi ko phir bahalaega

kho gae hain donon jaanib ke sire

kaun dil ki gutthiyan suljhaega

main kahan waiz kahan tauba karo

jo na samjha KHud wo kya samjhaega

thak ke aaKHir baiTh jaega ghubar

karwan munh dekh kar rah jaega

dil ke hathon se jo ghabraoge 'shad'

kaun is wahshi ko phir samjhaega

kam na samjho shauq ko ai 'shad' tum

ek na ek baDh ke ye aafat laega

hai KHizan gul-gasht ko jao na 'shad'

girya-e-shabnam na dekha jaega

kuchh na kahna 'shad' se haal-e-KHizan

is KHabar ko sunte hi mar jaega