teri zulfen tere ruKHsar tere lab mere

terī zulfeñ tire ruḳhsār tire lab mere

jitne pahlū haiñ tire husn ke vo sab mere

us se ab tark-e-mohabbat kā gila kyā ma.anī

mujh ko taslīm ki atvār the beDhab mere

phir vahī chāñd sar-e-shahr chaḌhe to ai kaash

us se raushan hoñ dar-o-bām bas ik shab mere

jin kā har lamha guzartā thā mirī qurbat meñ

duur o nazdīk nazar aate nahīñ ab mere

mujh se katrā ke guzar jaate haiñ derīna rafīq

rāste dekhte haiñ saḳht kaThin jab mere

ab agar khul hī ga.e ho to chalo yūñhī hī sahī

varna tum dost to pahle bhī rahe kab mere

kyuuñ mujhe shiddat-e-ehsās atā kī itnī

tujh se insāf kā tālib huuñ maiñ ai rab mere

ḳhalq kī sañg-zanī kā hai ye 'kausar' ehsān

tah meñ jis ke ga.e sab husn o qubah dab mere

teri zulfen tere ruKHsar tere lab mere

jitne pahlu hain tere husn ke wo sab mere

us se ab tark-e-mohabbat ka gila kya mani

mujh ko taslim ki atwar the beDhab mere

phir wahi chand sar-e-shahr chaDhe to ai kash

us se raushan hon dar-o-baam bas ek shab mere

jin ka har lamha guzarta tha meri qurbat mein

dur o nazdik nazar aate nahin ab mere

mujh se katra ke guzar jate hain derina rafiq

raste dekhte hain saKHt kaThin jab mere

ab agar khul hi gae ho to chalo yunhi hi sahi

warna tum dost to pahle bhi rahe kab mere

kyun mujhe shiddat-e-ehsas ata ki itni

tujh se insaf ka talib hun main ai rab mere

KHalq ki sang-zani ka hai ye 'kausar' ehsan

tah mein jis ke gae sab husn o qubah dab mere