teri zulfon ke pech-o-KHam ki qasam

terī zulfoñ ke pech-o-ḳham kī qasam

chain se haiñ tere sitam kī qasam

jis ne dekhīñ so dil gañvā baiThā

terī āñkheñ vo jām-e-jam kī qasam

ham to dekhā kiye the hasrat se

surḳhī-e-lab ko chashm-e-nam kī qasam

laḌkhaḌānā hai un kī fitrat meñ

kaun khaa.e tere qadam kī qasam

jaane kab pī thī par nasha na gayā

mere saaqī tere karam kī qasam

but ga.e but-kada hai vīrāna

dil hai baaqī abhī haram kī qasam

ho mubārak tumheñ ye bazm-e-turāb

ham bhī ḳhush haiñ jahān-e-ġham kī qasam

teri zulfon ke pech-o-KHam ki qasam

chain se hain tere sitam ki qasam

jis ne dekhin so dil ganwa baiTha

teri aankhen wo jam-e-jam ki qasam

hum to dekha kiye the hasrat se

surKHi-e-lab ko chashm-e-nam ki qasam

laDkhaDana hai un ki fitrat mein

kaun khae tere qadam ki qasam

jaane kab pi thi par nasha na gaya

mere saqi tere karam ki qasam

but gae but-kada hai virana

dil hai baqi abhi haram ki qasam

ho mubarak tumhein ye bazm-e-turab

hum bhi KHush hain jahan-e-gham ki qasam