teri zulfon ne kiya kis pe karam raat gae

terī zulfoñ ne kiyā kis pe karam raat ga.e

kis ke hāthoñ se nikāle ga.e ḳham raat ga.e

shab-e-vā'da ke masā.ib kā nahīñ maiñ hī shikār

ghaTne lagtā hai sitāroñ kā bhī dam raat ga.e

os paḌ jaatī hai ḳhushiyoñ pe na aane se tire

sar uThāte haiñ baham ranj-o-alam raat ga.e

zabt kartā huuñ magar zabt kī had hotī hai

ham se ruktī nahīñ yalġhār-e-alam raat ga.e

ruk ga.e saañs muñdī āñkheñ uḌe hosh-o-havās

khul gayā dil ke dilāsoñ kā bharam raat ga.e

lagī-lipTī se vo hote haiñ mubarrā jazbāt

jin pe fankār uThātā hai qalam raat ga.e

rāsta dekhtī haiñ shaam se nazreñ ai 'charḳh'

vo nahīñ aate to ho jaatī haiñ nam raat ga.e

teri zulfon ne kiya kis pe karam raat gae

kis ke hathon se nikale gae KHam raat gae

shab-e-wa'da ke masaib ka nahin main hi shikar

ghaTne lagta hai sitaron ka bhi dam raat gae

os paD jati hai KHushiyon pe na aane se tere

sar uThate hain baham ranj-o-alam raat gae

zabt karta hun magar zabt ki had hoti hai

hum se rukti nahin yalghaar-e-alam raat gae

ruk gae sans mundi aankhen uDe hosh-o-hawas

khul gaya dil ke dilason ka bharam raat gae

lagi-lipTi se wo hote hain mubarra jazbaat

jin pe fankar uThata hai qalam raat gae

rasta dekhti hain sham se nazren ai 'charKH'

wo nahin aate to ho jati hain nam raat gae