تیز رو لہر کی روانی میں

تیز رو لہر کی روانی میں

بہہ گئے خواب سارے پانی میں

جو مصنف کو مار بیٹھا ہے

اب بھی زندہ ہے اس کہانی میں

صرف انسان ہی نہیں مرتے

دل بھی مرتا ہے ناگہانی میں

کرچیاں چن رہی ہوں آج تلک

خواب دیکھا تھا اک جوانی میں

سارے موسم خزاں کے ہوتے ہیں

ٹوٹے خوابوں کی باغبانی میں

رات پاگل ہی ہو نہ جائے کہیں

چاندنی گھل رہی ہے پانی میں

تم کبھی روٹھنا نہیں مجھ سے

کچھ بھی کہتی رہوں روانی میں

ہجر آنکھوں میں ایسے اترا ہے

بن گئی لہر جیسے پانی میں

ایک سو ایک درد جھیلے ہیں

اک ابھاگن نے اک کہانی میں