تھا اسیروں میں قیامت کا نمایاں ہونا

تھا اسیروں میں قیامت کا نمایاں ہونا

فصل گل میں وہ مرا داخل زنداں ہونا

ہائے الفت میں مرا بے سر و ساماں ہونا

چاک دل چاک جگر چاک گریباں ہونا

تم مرے بعد ندامت سے پشیماں ہونا

ہاتھ ملنا کبھی انگشت بدنداں ہونا

صورت عیش میں آفات جہاں مضمر ہیں

گل کا کھلنا ہے حقیقت میں پریشاں ہونا

رحم آیا نہ بتوں کو کبھی اللہ اللہ

دیکھ کر خانۂ دل کا مرے ویراں ہونا

نہ ہوا درد محبت کا مداوا نہ ہوا

کام آیا نہ تری ایسی دوراں ہونا

مسکرا دے کہ سر قبر برس جائیں پھول

اک جہاں دیکھ لے صحرا کا گلستاں ہونا

ہو ترقیٔ ستم دست جنوں میں یا رب

میرے دامن کو مبارک ہو گریباں ہونا

ہو سکے تم سے تو اب صبر کرو اے مسعودؔ

دل کی تقدیر میں لکھا تھا پریشاں ہونا