tha dam-e-hawas hi kuchh aisa wo lauT ke aana bhul gaya

thā dām-e-havas hī kuchh aisā vo lauT ke aanā bhuul gayā

jo bastī bastī phirtā thā vo ghar kā rasta bhuul gayā

vo lamha kaisā lamha thā jab un se nazar Takrā.ī thī

ye manzil kaun sī manzil hai maiñ hosh meñ aanā bhuul gayā

ye baat sabhī ke ilm meñ hai aur saarā zamāna shāhid hai

vo shaḳhs zalīl-o-ḳhvār huā jo dard kā rishta bhuul gayā

vo sāmne the to kah na sakā jab lauT ga.e to yaad aaya

ye bhuul gayā vo bhuul gayā maiñ jaane kyā kyā bhuul gayā

ḳhush-fahmī kahāñ le aa.ī hai ab maiñ huuñ mirī tanhā.ī hai

maiñ bhuul gayā thā duniyā ko mujh ko bhī zamāna bhuul gayā

auroñ ke liye marham le kar maiñ galiyoñ galiyoñ bhaTkā huuñ

kyā kahiye magar ḳhud apne hī zaḳhmoñ kā mudāvā bhuul gayā

nairangī-e-ālam ne 'rāzī' vo talḳh haqā.eq baḳhshe haiñ

vo apnī kahānī bhuul ga.e maiñ apnā fasāna bhuul gayā

tha dam-e-hawas hi kuchh aisa wo lauT ke aana bhul gaya

jo basti basti phirta tha wo ghar ka rasta bhul gaya

wo lamha kaisa lamha tha jab un se nazar Takrai thi

ye manzil kaun si manzil hai main hosh mein aana bhul gaya

ye baat sabhi ke ilm mein hai aur sara zamana shahid hai

wo shaKHs zalil-o-KHwar hua jo dard ka rishta bhul gaya

wo samne the to kah na saka jab lauT gae to yaad aaya

ye bhul gaya wo bhul gaya main jaane kya kya bhul gaya

KHush-fahmi kahan le aai hai ab main hun meri tanhai hai

main bhul gaya tha duniya ko mujh ko bhi zamana bhul gaya

auron ke liye marham le kar main galiyon galiyon bhaTka hun

kya kahiye magar KHud apne hi zaKHmon ka mudawa bhul gaya

nairangi-e-alam ne 'raazi' wo talKH haqaeq baKHshe hain

wo apni kahani bhul gae main apna fasana bhul gaya