tha faKHr jis pe mujhko meri zat ki tarah

thā faḳhr jis pe mujh ko mirī zaat kī tarah

badlā hai vo bhī sūrat-e-hālāt kī tarah

fikr-e-ma.āsh zehn pe jab se muhīt hai

hai din kī raushnī bhī mujhe raat kī tarah

ummīd-e-vasl kā huā jo jaam chuur chuur

barse haiñ ashk aañkh se barsāt kī tarah

ab tak hai yaad aap kā andāz-e-guftugū

mujh ko surūr-o-kaif ke naġhmāt kī tarah

tab zindagī kā lutf hai yā-rab jahān meñ

un kī nazar ho ain ināyāt kī tarah

ġhash khā ke āḳhirash vo girā dushman-e-ḳhulūs

merā janāza dekh ke bārāt kī tarah

guzrī hai apnī zindagī tere firāq meñ

bismil ke karb-dāshta lamhāt kī tarah

ye kyā huā ki dil pe guzarne lagī girāñ

ab to ḳhushī kī baat bhī sadmāt kī tarah

'sā.ir' ye kyā huā hai zamāne kī chaal ko

miltā hai ab ḳhulūs bhī sauġhāt kī tarah

tha faKHr jis pe mujh ko meri zat ki tarah

badla hai wo bhi surat-e-haalat ki tarah

fikr-e-maash zehn pe jab se muhit hai

hai din ki raushni bhi mujhe raat ki tarah

ummid-e-wasl ka hua jo jam chur chur

barse hain ashk aankh se barsat ki tarah

ab tak hai yaad aap ka andaz-e-guftugu

mujh ko surur-o-kaif ke naghmat ki tarah

tab zindagi ka lutf hai ya-rab jahan mein

un ki nazar ho ain inayat ki tarah

ghash kha ke aaKHirash wo gira dushman-e-KHulus

mera janaza dekh ke baraat ki tarah

guzri hai apni zindagi tere firaq mein

bismil ke karb-dashta lamhat ki tarah

ye kya hua ki dil pe guzarne lagi giran

ab to KHushi ki baat bhi sadmat ki tarah

'sair' ye kya hua hai zamane ki chaal ko

milta hai ab KHulus bhi saughat ki tarah