tha ghair ka jo ranj-e-judai tamam shab

thā ġhair kā jo ranj-e-judā.ī tamām shab

niiñd un ko mere saath na aa.ī tamām shab

shikva mujhe na ho jo mukāfāt had se ho

vaañ sulh ek dam hai laḌā.ī tamām shab

ye Dar rahā ki sote na paa.eñ kahīñ mujhe

vā'de kī raat niiñd na aa.ī tamām shab

sach to ye hai ki bol ga.e aksar ahl-e-shauq

bulbul ne kī jo nāla-sarā.ī tamām shab

dam bhar bhī 'umr khoī jo zikr-e-raqīb meñ

kaifiyat-e-visāl na paa.ī tamām shab

thoḌā sā mere haal pe farmā kar iltifāt

karte rahe vo apnī baḌā.ī tamām shab

vo aah taar o paud ho jis kā havā-e-zulf

kartī hai ambarī o sabā.ī tamām shab

vo sub.h jalva jalvagar-e-bāġh thā jo raat

murġh-e-sahar ne dhuum machā.ī tamām shab

afsāne se bigāḌ hai an-ban hai ḳhvāb se

hai fikr-e-vasl o zikr-e-judā.ī tamām shab

jis kī shamīm-e-zulf pe maiñ ġhash huuñ 'shefta'

us ne shamīm-e-zulf suñghā.ī tamām shab

tha ghair ka jo ranj-e-judai tamam shab

nind un ko mere sath na aai tamam shab

shikwa mujhe na ho jo mukafat had se ho

wan sulh ek dam hai laDai tamam shab

ye Dar raha ki sote na paen kahin mujhe

wa'de ki raat nind na aai tamam shab

sach to ye hai ki bol gae aksar ahl-e-shauq

bulbul ne ki jo nala-sarai tamam shab

dam bhar bhi 'umr khoi jo zikr-e-raqib mein

kaifiyat-e-visal na pai tamam shab

thoDa sa mere haal pe farma kar iltifat

karte rahe wo apni baDai tamam shab

wo aah tar o paud ho jis ka hawa-e-zulf

karti hai ambari o sabai tamam shab

wo subh jalwa jalwagar-e-bagh tha jo raat

murgh-e-sahar ne dhum machai tamam shab

afsane se bigaD hai an-ban hai KHwab se

hai fikr-e-wasl o zikr-e-judai tamam shab

jis ki shamim-e-zulf pe main ghash hun 'shefta'

us ne shamim-e-zulf sunghai tamam shab