tha jaanib-e-dil subh-dam wo KHush-KHiram aaya hua

thā jānib-e-dil sub.h-dam vo ḳhush-ḳhirām aayā huā

aadhā qadam sū-e-gurez aur nīm-gām aayā huā

raqs aur pā-kūbī karūñ lāzim hai majzūbī karūñ

dekho to hai merā sanam merā imaam aayā huā

dariyā-e-darveshī ke beach tūfān-e-be-ḳhveshī ke beach

vo gauhar-e-sairāb vo sāhab-maqām aayā huā

ai dil batā ai chashm kah ye rū-e-dil-bar hī to hai

yā māh-e-charḳh-haft meñ bālā-e-bām aayā huā

hai zarra zarra par sadā ahlav-va-sahlan marhabā

kyā sar-zamīn-e-dil pe hai vo aaj shaam aayā huā

tujh par paḌī ye kī chhūT ai chashm-e-hairāñ kuchh to phuuT

kyā hadd-e-bīnā.ī meñ hai vo ġhaib-e-fām aayā huā

larzāñ hai dil meñ raaz sā sho.ala qadīm-āvām sā

yā lāla-e-ḳhāmosh par rañg-e-davām aayā huā

hai mausam-e-dīvāngī phir chaak ījād mirī

lauTā rahe haiñ pahle kā ḳhayyāt kaam aayā huā

merī taraf se ai aziiz dil meñ na rakhnā koī chiiz

phirte bhī dekhā hai kahīñ sāhab ġhulām aayā huā

ḳhurshīd-sāmānī tirī aur zarra-dāmānī mirī

hai ajūba dekhne har ḳhās-o-ām aayā huā

ik girdāḌī sahrā samet ik mauj uThī dariyā samet

duniyā-e-ḳhāk-o-āb meñ thā koī shaam aayā huā

yak umr-raftārī ke saath yak māh-sayyārī ke saath

yak charḳh-e-davārī ke saath gardish meñ jaam aayā huā

sad-chashm bedārī ke saath sad-sīna sarshārī ke saath

sau sau tarah shahbāz dil hai zer-e-dām aayā huā

tha jaanib-e-dil subh-dam wo KHush-KHiram aaya hua

aadha qadam su-e-gurez aur nim-gam aaya hua

raqs aur pa-kubi karun lazim hai majzubi karun

dekho to hai mera sanam mera imam aaya hua

dariya-e-darweshi ke beach tufan-e-be-KHweshi ke beach

wo gauhar-e-sairab wo sahab-maqam aaya hua

ai dil bata ai chashm kah ye ru-e-dil-bar hi to hai

ya mah-e-charKH-haft mein baala-e-baam aaya hua

hai zarra zarra par sada ahlaw-wa-sahlan marhaba

kya sar-zamin-e-dil pe hai wo aaj sham aaya hua

tujh par paDi ye ki chhuT ai chashm-e-hairan kuchh to phuT

kya hadd-e-binai mein hai wo ghaib-e-fam aaya hua

larzan hai dil mein raaz sa shoala qadim-awam sa

ya lala-e-KHamosh par rang-e-dawam aaya hua

hai mausam-e-diwangi phir chaak ijad meri

lauTa rahe hain pahle ka KHayyat kaam aaya hua

meri taraf se ai aziz dil mein na rakhna koi chiz

phirte bhi dekha hai kahin sahab ghulam aaya hua

KHurshid-samani teri aur zarra-damani meri

hai ajuba dekhne har KHas-o-am aaya hua

ek girdaDi sahra samet ek mauj uThi dariya samet

duniya-e-KHak-o-ab mein tha koi sham aaya hua

yak umr-raftari ke sath yak mah-sayyari ke sath

yak charKH-e-dawari ke sath gardish mein jam aaya hua

sad-chashm bedari ke sath sad-sina sarshaari ke sath

sau sau tarah shahbaz dil hai zer-e-dam aaya hua