tha jo mere zauq ka saman aadha rah gaya

thā jo mere zauq kā sāmān aadhā rah gayā

bahr-e-dil meñ ishq kā tūfān aadhā rah gayā

maiñ idhar bechain huuñ aur vo udhar hai muztarib

dāstān-e-ishq kā unvān aadhā rah gayā

chand lamhe ba.ad hī aa kar vo ruḳhsat ho gayā

us se milne kā thā jo armān aadhā rah gayā

us kī tasvīr-e-tasavvur hai nazar ke sāmne

ḳhāna-e-dil meñ jo thā mehmān aadhā rah gayā

tishna-e-takmīl hai mere savāloñ kā javāb

maiñ samajhtā thā jise āsān aadhā rah gayā

ibn-e-ādam kī kabhī puurī nahīñ hotī havas

vo samajhtā hai abhī sāmān aadhā rah gayā

ilm zāhir aur bātin lāzim-o-malzūm haiñ

jo na samjhe us ko vo insān aadhā rah gayā

apnī apnī sarhadoñ se haiñ sabhī nā-mutma.in

chiin aadhā rah gayā jāpān aadhā rah gayā

sab kī Daflī hai alag aur sab kā apnā raag hai

shaiḳh aadhā rah gayā aur ḳhaan aadhā rah gayā

nāqidoñ ke darmiyāñ hai in dinoñ mauzū-e-bahs

'mīr' aur 'ġhālib' kā jo dīvān aadhā rah gayā

sher likh saktā nahīñ jo kar rahā hai is kī sharh

sher-fahmī kā thā jo ruj.hān aadhā rah gayā

kah rahā hai jis kī nazroñ meñ barābar haiñ sabhī

is amīr-e-shahr kā farmān aadhā rah gayā

hai kabhī niime darūñ vo aur kabhī niime barūñ

aadmī kā āj-kal īmān aadhā rah gayā

ik jhalak dikhlā ke apnī jo kabhī lauTā nahīñ

us ke 'barqī' hijr meñ be-jān aadhā rah gayā

tha jo mere zauq ka saman aadha rah gaya

bahr-e-dil mein ishq ka tufan aadha rah gaya

main idhar bechain hun aur wo udhar hai muztarib

dastan-e-ishq ka unwan aadha rah gaya

chand lamhe baad hi aa kar wo ruKHsat ho gaya

us se milne ka tha jo arman aadha rah gaya

us ki taswir-e-tasawwur hai nazar ke samne

KHana-e-dil mein jo tha mehman aadha rah gaya

tishna-e-takmil hai mere sawalon ka jawab

main samajhta tha jise aasan aadha rah gaya

ibn-e-adam ki kabhi puri nahin hoti hawas

wo samajhta hai abhi saman aadha rah gaya

ilm zahir aur baatin lazim-o-malzum hain

jo na samjhe us ko wo insan aadha rah gaya

apni apni sarhadon se hain sabhi na-mutmain

chin aadha rah gaya japan aadha rah gaya

sab ki Dafli hai alag aur sab ka apna rag hai

shaiKH aadha rah gaya aur KHan aadha rah gaya

naqidon ke darmiyan hai in dinon mauzu-e-bahs

'mir' aur 'ghaalib' ka jo diwan aadha rah gaya

sher likh sakta nahin jo kar raha hai is ki sharh

sher-fahmi ka tha jo rujhan aadha rah gaya

kah raha hai jis ki nazron mein barabar hain sabhi

is amir-e-shahr ka farman aadha rah gaya

hai kabhi nime darun wo aur kabhi nime barun

aadmi ka aaj-kal iman aadha rah gaya

ek jhalak dikhla ke apni jo kabhi lauTa nahin

us ke 'barqi' hijr mein be-jaan aadha rah gaya