tha kahan likhna use lekin kahan par likh diya

thā kahāñ likhnā use lekin kahāñ par likh diyā

maiñ zamīñ kā harf mujh ko āsmāñ par likh diyā

jis ke paḌhne se rahī qāsir bhañvar kī aañkh bhī

kaun jaane kyā havā ne bādbāñ par likh diyā

kuchh to kar dariyā mire in ko Dubo yā paar kar

kashtiyoñ ne apnā dukh āb-e-ravāñ par likh diyā

baiTh kar ab zard pattoñ ke varaq palTā karo

tabsira likhne ko mausam ne ḳhizāñ par likh diyā

hashr meñ ḳhāna-ḳharābī ko Thikāna chāhiye

us ne merā naam bhī apne makāñ par likh diyā

aur bā-ma.anī huā tashkīk kā pichhlā nisāb

kyā kahūñ ahl-e-yaqīñ ne kyā gumāñ par likh diyā

tum ise kah lo hisāb-e-dostāñ-dar-dil 'fazā'

ham ne apnā naf.a bhī lauh-e-ziyāñ par likh diyā

tha kahan likhna use lekin kahan par likh diya

main zamin ka harf mujh ko aasman par likh diya

jis ke paDhne se rahi qasir bhanwar ki aankh bhi

kaun jaane kya hawa ne baadban par likh diya

kuchh to kar dariya mere in ko Dubo ya par kar

kashtiyon ne apna dukh aab-e-rawan par likh diya

baiTh kar ab zard patton ke waraq palTa karo

tabsira likhne ko mausam ne KHizan par likh diya

hashr mein KHana-KHarabi ko Thikana chahiye

us ne mera nam bhi apne makan par likh diya

aur ba-mani hua tashkik ka pichhla nisab

kya kahun ahl-e-yaqin ne kya guman par likh diya

tum ise kah lo hisab-e-dostan-dar-dil 'faza'

hum ne apna nafa bhi lauh-e-ziyan par likh diya