tha nasheman ki bulandi pe Thikana mushkil

thā nasheman kī bulandī pe Thikānā mushkil

kaise guzre mire din raat batānā mushkil

muddatoñ saath añdheroñ kā diyā hai maiñ ne

ab ujāloñ se huā haath milānā mushkil

kyā koī ġhair ke bhī vāste royā hogā

aaj hai ḳhud pe bhī do ashk bahānā mushkil

mere aate hī machī shahr meñ tere halchal

ab to rusvā.ī se hai tujh ko bachānā mushkil

baḌh to aa.ī haiñ vo zulfeñ mujhe Dasne ke liye

aisī rātoñ kā hai ab saath nibhānā mushkil

har qadam par thī ta.āqub meñ mire nākāmī

sham-e-ummīd kā phir bhī thā bujhānā mushkil

aisī gūñje hai kahīñ duur koī shahnā.ī

ki tirī yaad se dāman hai bachānā mushkil

tha nasheman ki bulandi pe Thikana mushkil

kaise guzre mere din raat batana mushkil

muddaton sath andheron ka diya hai main ne

ab ujalon se hua hath milana mushkil

kya koi ghair ke bhi waste roya hoga

aaj hai KHud pe bhi do ashk bahana mushkil

mere aate hi machi shahr mein tere halchal

ab to ruswai se hai tujh ko bachana mushkil

baDh to aai hain wo zulfen mujhe Dasne ke liye

aisi raaton ka hai ab sath nibhana mushkil

har qadam par thi taaqub mein mere nakaami

sham-e-ummid ka phir bhi tha bujhana mushkil

aisi gunje hai kahin dur koi shahnai

ki teri yaad se daman hai bachana mushkil