tha nisf un ka aur wo pura liye hue

thā nisf un kā aur vo puurā liye hue

baiThe haiñ mere hisse kā hissa liye hue

āñkhoñ meñ apnī sāġhar-o-mīnā liye hue

chaḌh jaa.e bin piye hī vo nashsha liye hue

tanhā.iyāñ sameT ke baiThe haiñ ham ḳhamosh

jaise ki koī kuuze meñ dariyā liye hue

mohsin haiñ mere yā ki haiñ dushman nahīñ ḳhabar

vo ghūmte haiñ chehre pe chehra liye hue

gardish hamāre sāmne aatī hai din-ba-din

vo hī purānā roz kā qissa liye hue

karne ko qatl merā haiñ bechain kis qadar

nāgin ho jaise aañkh meñ badlā liye hue

ik roz maut ko hī lagā leñge ham gale

jiine kī dil meñ yūñhī tamanna liye hue

'ātif' se pyaar hai unheñ shāyad isī liye

baiThe haiñ us kā bazm meñ charchā liye hue

tha nisf un ka aur wo pura liye hue

baiThe hain mere hisse ka hissa liye hue

aankhon mein apni saghar-o-mina liye hue

chaDh jae bin piye hi wo nashsha liye hue

tanhaiyan sameT ke baiThe hain hum KHamosh

jaise ki koi kuze mein dariya liye hue

mohsin hain mere ya ki hain dushman nahin KHabar

wo ghumte hain chehre pe chehra liye hue

gardish hamare samne aati hai din-ba-din

wo hi purana roz ka qissa liye hue

karne ko qatl mera hain bechain kis qadar

nagin ho jaise aankh mein badla liye hue

ek roz maut ko hi laga lenge hum gale

jine ki dil mein yunhi tamanna liye hue

'atif' se pyar hai unhen shayad isi liye

baiThe hain us ka bazm mein charcha liye hue