Thahraw aa gaya hai kuchh aisa zindagi mein

Thahrāv aa gayā hai kuchh aisā zindagī meñ

ki bahte bahte jharnā mil jaa.e juuñ nadī meñ

puujā hai us ne tum ko chāhā na āshiqī meñ

ab lutf kyā milegā is dil ko bandagī meñ

dil hasratoñ kā jamghaT phir kaisā sūnā-pan ye

do chaar pal kī ḳhushiyāñ aa.iiñ thiiñ zindagī meñ

dil chhū gayā ye un kā honā paḌā pashemāñ

kaisā asar thā āḳhir āñkhoñ kī is namī meñ

chāho to yaad rakho chāho agar bhulā do

ehsās ek sā hai is dil ko be-ḳhudī meñ

tanqīd par hamārī 'uzma' udaas kyuuñ hai

tum meñ jo naqs DhūñDe shāyad vo the hamīñ meñ

Thahraw aa gaya hai kuchh aisa zindagi mein

ki bahte bahte jharna mil jae jun nadi mein

puja hai us ne tum ko chaha na aashiqi mein

ab lutf kya milega is dil ko bandagi mein

dil hasraton ka jamghaT phir kaisa suna-pan ye

do chaar pal ki KHushiyan aain thin zindagi mein

dil chhu gaya ye un ka hona paDa pasheman

kaisa asar tha aaKHir aankhon ki is nami mein

chaho to yaad rakho chaho agar bhula do

ehsas ek sa hai is dil ko be-KHudi mein

tanqid par hamari 'uzma' udas kyun hai

tum mein jo naqs DhunDe shayad wo the hamin mein