ٹھہری ہوئی یادوں کا جہاں کیوں نہیں جاتا

ٹھہری ہوئی یادوں کا جہاں کیوں نہیں جاتا

مدت ہوئی آنکھوں سے دھواں کیوں نہیں جاتا

امید کی شاخوں میں ثمر کیوں نہیں آتے

مرجھائے ہوئے دل میں گماں کیوں نہیں جاتا

گلشن کے ہر اک گوشے میں ہے جشن بہاراں

دل سے مگر احساس خزاں کیوں نہیں جاتا

ان سے تو ذرا پوچھئے بازار وفا سے

یہ سلسلۂ سود و زیاں کیوں نہیں جاتا

مے خانہ بہت دور ہے ان آنکھوں سے لیکن

شیشوں کے چٹخنے کا سماں کیوں نہیں جاتا

الجھے ہوئے حالات کی گتھی نہیں کھلتی

ناخن سے مرے قرض گراں کیوں نہیں جاتا