Thahri hui yaadon ka jahan kyon nahin jata

Thahrī huī yādoñ kā jahāñ kyoñ nahīñ jaatā

muddat huī āñkhoñ se dhuāñ kyoñ nahīñ jaatā

ummīd kī shāḳhoñ meñ samar kyoñ nahīñ aate

murjhā.e hue dil meñ gumāñ kyoñ nahīñ jaatā

gulshan ke har ik goshe meñ hai jashn-e-bahārāñ

dil se magar ehsās-e-ḳhizāñ kyoñ nahīñ jaatā

un se to zarā pūchhiye bāzār-e-vafā se

ye silsila-e-sūd-o-ziyāñ kyoñ nahīñ jaatā

mai-ḳhāna bahut duur hai in āñkhoñ se lekin

shīshoñ ke chaTaḳhne kā samāñ kyoñ nahīñ jaatā

uljhe hue hālāt kī gutthī nahīñ khultī

nāḳhun se mire qarz-e-girāñ kyoñ nahīñ jaatā

Thahri hui yaadon ka jahan kyon nahin jata

muddat hui aankhon se dhuan kyon nahin jata

ummid ki shaKHon mein samar kyon nahin aate

murjhae hue dil mein guman kyon nahin jata

gulshan ke har ek goshe mein hai jashn-e-bahaaran

dil se magar ehsas-e-KHizan kyon nahin jata

un se to zara puchhiye bazar-e-wafa se

ye silsila-e-sud-o-ziyan kyon nahin jata

mai-KHana bahut dur hai in aankhon se lekin

shishon ke chaTaKHne ka saman kyon nahin jata

uljhe hue haalat ki gutthi nahin khulti

naKHun se mere qarz-e-giran kyon nahin jata