thakan se tan-badan TuTa paDa hai

thakan se tan-badan TuuTā paḌā hai

masāfat ko magar rasta paḌā hai

lahū se tar-ba-tar haiñ paañv lekin

hameñ har haal meñ chalnā paḌā hai

yahāñ maiñ tishnagī se jāñ-balab huuñ

udhar mīloñ abhī sahrā paḌā hai

koī sāñseñ bhalā kab tak ḳharīde

ye saudā to bahut mahñgā paḌā hai

ye raat ab tak nahīñ suljhī hai mujh se

udhar din bhī abhī uljhā paḌā hai

maiñ āḳhir ab ise kaise sañbhālūñ

yahāñ to ghar kā ghar bikhrā paḌā hai

bahut bechain sā rahtā huuñ din-bhar

sunā hai gaañv meñ sūkhā paḌā hai

bulātā hai mujhe āvāz de kar

vo mere ghar kā jo malba paḌā hai

mirā chandā gayā pardes jab se

ye ghar āñgan bahut suunā paḌā hai

bahut bezār se lagte ho tum bhī

asar tum par 'nafas' gahrā paḌā hai

thakan se tan-badan TuTa paDa hai

masafat ko magar rasta paDa hai

lahu se tar-ba-tar hain panw lekin

hamein har haal mein chalna paDa hai

yahan main tishnagi se jaan-balab hun

udhar milon abhi sahra paDa hai

koi sansen bhala kab tak KHaride

ye sauda to bahut mahnga paDa hai

ye raat ab tak nahin suljhi hai mujh se

udhar din bhi abhi uljha paDa hai

main aaKHir ab ise kaise sanbhaalun

yahan to ghar ka ghar bikhra paDa hai

bahut bechain sa rahta hun din-bhar

suna hai ganw mein sukha paDa hai

bulata hai mujhe aawaz de kar

wo mere ghar ka jo malba paDa hai

mera chanda gaya pardes jab se

ye ghar aangan bahut suna paDa hai

bahut bezar se lagte ho tum bhi

asar tum par 'nafas' gahra paDa hai