تھے اجالے جس جگہ ٹھوکر وہیں کھائی گئی

تھے اجالے جس جگہ ٹھوکر وہیں کھائی گئی

روشنی آنکھوں میں کیا آئی کہ بینائی گئی

مسکرا کر دیکھ لینے کے فسانے بن گئے

اک ذرا سی بات تھی اور کتنی پھیلائی گئی

سرد جسموں میں حرارت ہی نہ آئی آج تک

بارہا چاروں طرف سے آگ برسائی گئی

اب تو ان کے سامنے بھی آ چکی ہے مصلحت

سچ کہوں تو ہاتھ سے سچوں کے سچائی گئی

کاروبار زندگی چلتا ہے صورت دیکھ کر

ہر مدد پہنچے ہوئے لوگوں میں پہنچائی گئی

اب محبت کا سمندر گھٹتے گھٹتے رہ گیا

ڈبکیاں کھائیں کہاں پانی سے گہرائی گئی

جانکنی کے کرب کا احساس کیا ہوگا اسے

موت جس کی زندگی میں بارہا آئی گئی

پہنچے کفرستان تو ایمان تازہ ہو گیا

خضرؔ بت خانے میں بھی شان خدا پائی گئی