the ujale jis jagah Thokar wahin khai gai

the ujāle jis jagah Thokar vahīñ khaa.ī ga.ī

raushnī āñkhoñ meñ kyā aa.ī ki bīnā.ī ga.ī

muskurā kar dekh lene ke fasāne ban ga.e

ik zarā sī baat thī aur kitnī phailā.ī ga.ī

sard jismoñ meñ harārat hī na aa.ī aaj tak

bārhā chāroñ taraf se aag barsā.ī ga.ī

ab to un ke sāmne bhī aa chukī hai maslahat

sach kahūñ to haath se sachchoñ ke sachchā.ī ga.ī

kārobār-e-zindagī chaltā hai sūrat dekh kar

har madad pahuñche hue logoñ meñ pahuñchā.ī ga.ī

ab mohabbat kā samundar ghaTte ghaTte rah gayā

Dubkiyāñ khā.eñ kahāñ paanī se gahrā.ī ga.ī

jāñkanī ke karb kā ehsās kyā hogā use

maut jis kī zindagī meñ bārhā aa.ī ga.ī

pahuñche kufristān to īmān taaza ho gayā

'ḳhizr' but-ḳhāne meñ bhī shān-e-ḳhudā paa.ī ga.ī

the ujale jis jagah Thokar wahin khai gai

raushni aankhon mein kya aai ki binai gai

muskura kar dekh lene ke fasane ban gae

ek zara si baat thi aur kitni phailai gai

sard jismon mein hararat hi na aai aaj tak

barha chaaron taraf se aag barsai gai

ab to un ke samne bhi aa chuki hai maslahat

sach kahun to hath se sachchon ke sachchai gai

karobar-e-zindagi chalta hai surat dekh kar

har madad pahunche hue logon mein pahunchai gai

ab mohabbat ka samundar ghaTte ghaTte rah gaya

Dubkiyan khaen kahan pani se gahrai gai

jaankani ke karb ka ehsas kya hoga use

maut jis ki zindagi mein barha aai gai

pahunche kufristan to iman taza ho gaya

'KHizr' but-KHane mein bhi shan-e-KHuda pai gai