تھی جس کی سلطنت کبھی حد نگاہ تک

تھی جس کی سلطنت کبھی حد نگاہ تک

ملتی نہیں ہے اس کو کہیں اب پناہ تک

کچھ نیک لوگ نار حسد سے سلگ اٹھے

پہنچا جو تیرا فیض ہم اہل گناہ تک

ماں باپ کے وجود سے روشن ہے اتنا گھر

تاریک لگ رہے ہیں مجھے مہر و ماہ تک

بت خانۂ دماغ کا جادو اتر گیا

پہنچے جب اپنے دل کی حسیں خانقاہ تک

شطرنج کھیلنے میں ہوئے اس طرح مگن

دشمن کی تیغ آ گئی عالم پناہ تک

بس اتنا ہی نہیں مرا قاتل بری ہوا

مجرم بتا دئے گئے میرے گواہ تک

دینا تھا جن کو شعر سے پیغام انقلاب

محدود ہو چکے ہیں فقط واہ واہ تک

سچ بولنے کے شوق میں توڑا ہے ایک دل

نیکی کے راستے سے گئے ہم گناہ تک

کن کن اذیتوں سے گزرنا پڑا ہمیں

پانے سے لے کے آپ کو کھونے کی چاہ تک

تیری سیاہ چشم سے پر نور ایک راہ

آتی ہے اس نبیلؔ کے قلب سیاہ تک