thi mohabbat kabhi aaj-kal to nahin

thī mohabbat kabhī āj-kal to nahīñ

sun mirī jaan ab yuuñ badal to nahīñ

zindagī hai musalsal aziyyat magar

ḳhud-kushī is aziyyat kā hal to nahīñ

jab masā.il hī ḳhud-sāḳhta haiñ mire

phir gila rab se achchhā 'amal to nahīñ

sab haiñ achchhe magar bas hai anmol vo

koī bhī us kā ne'mul-badal to nahīñ

zindagī bhar to maiñ sabr kartā rahā

haañ magar sabr kā phal ajal to nahīñ

tujh ko ye taḳht mil hī gayā hai agar

to ġharīboñ ko itnā kuchal to nahīñ

mushkileñ Tal hī jaatī haiñ ik din 'vajīh'

yaar koī bhī mushkil aTal to nahīñ

thi mohabbat kabhi aaj-kal to nahin

sun meri jaan ab yun badal to nahin

zindagi hai musalsal aziyyat magar

KHud-kushi is aziyyat ka hal to nahin

jab masail hi KHud-saKHta hain mere

phir gila rab se achchha 'amal to nahin

sab hain achchhe magar bas hai anmol wo

koi bhi us ka ne'mul-badal to nahin

zindagi bhar to main sabr karta raha

han magar sabr ka phal ajal to nahin

tujh ko ye taKHt mil hi gaya hai agar

to gharibon ko itna kuchal to nahin

mushkilen Tal hi jati hain ek din 'wajih'

yar koi bhi mushkil aTal to nahin