thi umid-e-mahr un ko mehrban samjha tha main

thī umīd-e-mahr un ko mehrbāñ samjhā thā maiñ

vo sitam Dhā.eñge mujh par ye kahāñ samjhā thā maiñ

arsh se baḌh chaḌh ke un kā āstāñ samjhā thā maiñ

un ke kūche kī zamīñ ko āsmāñ samjhā thā maiñ

kyoñ na ho dushvār jaanā manzil-e-maqsūd tak

thā bagūlā jis ko gard-e-kārvāñ samjhā thā maiñ

iztirāb-e-dil ne ifshā dard-e-ulfat kar diyā

haa.e nādānī ki us ko rāzdāñ samjhā thā maiñ

ho ga.ī tum par tasadduq ho ga.ī tum par nisār

varna apnī zindagī ko rā.egāñ samjhā thā maiñ

vo na is ghar meñ mile mujh ko na us ghar meñ mile

ka.aba bhī but-ḳhāna bhī un kā makāñ samjhā thā maiñ

aaj vo ek ek kī sau sau sunāne baiThe haiñ

jin ko kal tak be-dahān-o-be-zabāñ samjhā thā maiñ

kah rahe the jab vo mere dard-e-dil kā mājrā

goyā un ke muñh meñ apnī hī zabāñ samjhā thā maiñ

bahr-e-ālam meñ thī merī zindagī misl-e-habāb

haif kyoñ is ko hayāt-e-jāvidāñ samjhā thā maiñ

vahshat-e-dil baḌh ga.ī kyā ḳhaak bahle dil yahāñ

gulshan-e-āfāq ko bāġh-e-jināñ samajhtā thā maiñ

ḳhāl-e-rū-e-dost kī mid.hat na tum se ho sake

shā.iroñ meñ tum ko 'sābir' nukta-dāñ samjhā thā maiñ

thi umid-e-mahr un ko mehrban samjha tha main

wo sitam Dhaenge mujh par ye kahan samjha tha main

arsh se baDh chaDh ke un ka aastan samjha tha main

un ke kuche ki zamin ko aasman samjha tha main

kyon na ho dushwar jaana manzil-e-maqsud tak

tha bagula jis ko gard-e-karwan samjha tha main

iztirab-e-dil ne ifsha dard-e-ulfat kar diya

hae nadani ki us ko raazdan samjha tha main

ho gai tum par tasadduq ho gai tum par nisar

warna apni zindagi ko raegan samjha tha main

wo na is ghar mein mile mujh ko na us ghar mein mile

kaba bhi but-KHana bhi un ka makan samjha tha main

aaj wo ek ek ki sau sau sunane baiThe hain

jin ko kal tak be-dahan-o-be-zaban samjha tha main

kah rahe the jab wo mere dard-e-dil ka majra

goya un ke munh mein apni hi zaban samjha tha main

bahr-e-alam mein thi meri zindagi misl-e-habab

haif kyon is ko hayat-e-jawidan samjha tha main

wahshat-e-dil baDh gai kya KHak bahle dil yahan

gulshan-e-afaq ko bagh-e-jinan samajhta tha main

KHal-e-ru-e-dost ki midhat na tum se ho sake

shairon mein tum ko 'sabir' nukta-dan samjha tha main