thi zarf-e-wazu mein koi shai pi gae kya aap

thī zarf-e-vazū meñ koī shai pī ga.e kyā aap

ai shaiḳh yahāñ kaun hai maiñ chuur huuñ yā aap

dīvānoñ ke sar ho ga.ī kyā zulf-e-dutā aap

vo jā ke gale apne lagā laa.e bulā aap

hañs hañs ke mujhe aap abas kos rahe haiñ

ro ro ke mire vāste māñgeñge du'ā aap

uḌte bhī agar ham to qafas le ke na uḌte

sayyād qafas sū-e-chaman uḌ ke chalā aap

jo uTh nahīñ sakte the ga.e uTh ke lahad meñ

baiThe raheñ ab ghar meñ liye uzr-e-hinā aap

jaate nahīñ ham mast kabhī uTh ke haram se

aatī hai yahāñ uḌ ke mai-e-hosh-rubā aap

kyuuñ phir ga.iiñ kambaḳht kī āñkheñ dam-e-āḳhir

rakhte the bahut ġhair se ummīd-e-vafā aap

āvāz mirī baiThī hai ai hazrat-e-zāhid

kyuuñ bahr-e-azāñ aaj dabāte haiñ galā aap

halkā sā ġhilāf ek thā sayyād qafas par

thī aur na kuchh rok rukī mujh se sabā aap

ham dil meñ utāreñge ye kahtī haiñ nigāheñ

aa jaa.eñ kisī tarah lab-e-bām zarā aap

qaabū kā tumhāre bhī nahīñ josh-e-javānī

be-chheḌe hue TūTte haiñ band-e-qabā aap

mohtāt 'riyāz' aap javānī meñ bahut haiñ

piirī meñ bhī lūTeñge javānī kā mazā aap

thi zarf-e-wazu mein koi shai pi gae kya aap

ai shaiKH yahan kaun hai main chur hun ya aap

diwanon ke sar ho gai kya zulf-e-duta aap

wo ja ke gale apne laga lae bula aap

hans hans ke mujhe aap abas kos rahe hain

ro ro ke mere waste mangenge du'a aap

uDte bhi agar hum to qafas le ke na uDte

sayyaad qafas su-e-chaman uD ke chala aap

jo uTh nahin sakte the gae uTh ke lahad mein

baiThe rahen ab ghar mein liye uzr-e-hina aap

jate nahin hum mast kabhi uTh ke haram se

aati hai yahan uD ke mai-e-hosh-ruba aap

kyun phir gain kambaKHt ki aankhen dam-e-aKHir

rakhte the bahut ghair se ummid-e-wafa aap

aawaz meri baiThi hai ai hazrat-e-zahid

kyun bahr-e-azan aaj dabaate hain gala aap

halka sa ghilaf ek tha sayyaad qafas par

thi aur na kuchh rok ruki mujh se saba aap

hum dil mein utarenge ye kahti hain nigahen

aa jaen kisi tarah lab-e-baam zara aap

qabu ka tumhaare bhi nahin josh-e-jawani

be-chheDe hue TuTte hain band-e-qaba aap

mohtat 'riyaz' aap jawani mein bahut hain

piri mein bhi luTenge jawani ka maza aap