ٹھیک ہے آپ بے خطا ہی سہی

ٹھیک ہے آپ بے خطا ہی سہی

میری قاتل مری وفا ہی سہی

ہم بھی کچھ ایسے بے مقام نہیں

تو خدا ہے اگر خدا ہی سہی

قتل ہونا مری وراثت ہے

قتل کرنا تری ادا ہی سہی

جا ملے سب صف مخالف میں

زد پہ تنہا مری انا ہی سہی

چاند سورج نہیں ہوں مانگے کا

میں کہ مٹی کا اک دیا ہی سہی

ڈستا رہتا ہے شب کا سناٹا

جان بھولے سے اک صدا ہی سہی

دوستی کی بھی کوئی شرط ہے کیا

دوست ہے وہ تو بے وفا ہی سہی

ساری مخلوق ہے خدا والی

ہم سا اک شخص بے خدا ہی سہی