Thikana hai kahin jaen kahan na-chaar baiThe hain

Thikānā hai kahīñ jaa.eñ kahāñ nā-chār baiThe haiñ

ijāzat jab nahīñ dar kī pas-e-dīvār baiThe haiñ

ye matlab hai ki mahfil meñ manā.e aur man jaa.eñ

vo mere chheḌne ko ġhair se bezār baiThe haiñ

ḳharīdār aa rahe haiñ har taraf se naqd-e-jāñ le kar

vo yūsuf ban ke bikne ko sar-e-bāzār baiThe haiñ

achānak le na luuñ bosa ye khaTkā un ke dil meñ hai

mire pahlū meñ baiThe haiñ magar hoshyār baiThe haiñ

tumhāre āshiqoñ meñ be-qarārī kyā hī phailī hai

jidhar dekho jigar thāme hue do-chār baiThe haiñ

qayāmat hai sitam murde pe bhī un ko gavārā hai

mirā lāsha uThāne ke liye aġhyār baiThe haiñ

lab-e-bām aa ke dikhlā vo tamāshā tuur kā tum bhī

baḌe mauqe se dar par tālib-e-dīdār baiThe haiñ

'asar' kyūñ-kar na jānūñ us ke dar ko qibla-e-ālam

usī jānib ka.ī ruḳh kāfir o dīñ-dār baiThe haiñ

Thikana hai kahin jaen kahan na-chaar baiThe hain

ijazat jab nahin dar ki pas-e-diwar baiThe hain

ye matlab hai ki mahfil mein manae aur man jaen

wo mere chheDne ko ghair se bezar baiThe hain

KHaridar aa rahe hain har taraf se naqd-e-jaan le kar

wo yusuf ban ke bikne ko sar-e-bazar baiThe hain

achanak le na lun bosa ye khaTka un ke dil mein hai

mere pahlu mein baiThe hain magar hoshyar baiThe hain

tumhaare aashiqon mein be-qarari kya hi phaili hai

jidhar dekho jigar thame hue do-chaar baiThe hain

qayamat hai sitam murde pe bhi un ko gawara hai

mera lasha uThane ke liye aghyar baiThe hain

lab-e-baam aa ke dikhla wo tamasha tur ka tum bhi

baDe mauqe se dar par talib-e-didar baiThe hain

'asar' kyun-kar na jaanun us ke dar ko qibla-e-alam

usi jaanib kai ruKH kafir o din-dar baiThe hain