thirakti lau ki bas ek aaKHiri dua sunta

thiraktī lau kī bas ik āḳhirī duā suntā

phir us ke ba.ad na kuchh mauja-e-havā suntā

mujhe bhī lagtī kuchh āsān manzil-e-dushvār

jo dūsroñ kī sadā-e-naqūsh-e-pā suntā

kuchh is qadar bhī zamāne meñ qaht-e-harf na thā

vo āshnā thā to āvāz-e-āshnā suntā

ba-juz zaḳhīra-e-auhām paas kuchh bhī nahīñ

ye baat kaash vo girvīda-e-anā suntā

use pukār chukā zindagī meñ haar chukā

mirā ḳhudā thā to phir merī iltijā suntā

ham ek umr se 'mohsin' ḳhumār-e-ḳhvāb meñ haiñ

hamārī baat zamāne meñ koī kyā suntā

thirakti lau ki bas ek aaKHiri dua sunta

phir us ke baad na kuchh mauja-e-hawa sunta

mujhe bhi lagti kuchh aasan manzil-e-dushwar

jo dusron ki sada-e-naqush-e-pa sunta

kuchh is qadar bhi zamane mein qaht-e-harf na tha

wo aashna tha to aawaz-e-ashna sunta

ba-juz zaKHira-e-auham pas kuchh bhi nahin

ye baat kash wo girwida-e-ana sunta

use pukar chuka zindagi mein haar chuka

mera KHuda tha to phir meri iltija sunta

hum ek umr se 'mohsin' KHumar-e-KHwab mein hain

hamari baat zamane mein koi kya sunta