thoDa sa mahaul banana hota hai

thoḌā sā māhaul banānā hotā hai

varna kisī ke saath zamāna hotā hai

sachchā sher sunāne vaale ḳhatm hue

ab to ḳhālī khel dikhānā hotā hai

aañsū pahlī shart hai is samjhaute kī

ġham to sāñsoñ kā jurmāna hotā hai

lāl-qile kī dīvāroñ par likhvā do

dil sab se mahfūz Thikānā hotā hai

duniyā meñ bhar-mār hai naqlī logoñ kī

sau meñ koī ek divāna hotā hai

raat hamāre ghar jaldī aa jaayā kar

hameñ savere kaam pe jaanā hotā hai

aisī koī baat nahīñ māyūsī kī

sach meñ thoḌā sā afsāna hotā hai

sab kī apnī ek ikaa.ī hotī hai

sab kā apnā ek zamāna hotā hai

ham ne to un ko bhī luTte dekhā hai

jin ke chār-qadam par thāna hotā hai

aaj bichhaḌte vaqt mujhe ma.alūm huā

logoñ meñ ehsās kā ḳhāna hotā hai

thoDa sa mahaul banana hota hai

warna kisi ke sath zamana hota hai

sachcha sher sunane wale KHatm hue

ab to KHali khel dikhana hota hai

aansu pahli shart hai is samjhaute ki

gham to sanson ka jurmana hota hai

lal-qile ki diwaron par likhwa do

dil sab se mahfuz Thikana hota hai

duniya mein bhar-mar hai naqli logon ki

sau mein koi ek diwana hota hai

raat hamare ghar jaldi aa jaya kar

hamein sawere kaam pe jaana hota hai

aisi koi baat nahin mayusi ki

sach mein thoDa sa afsana hota hai

sab ki apni ek ikai hoti hai

sab ka apna ek zamana hota hai

hum ne to un ko bhi luTte dekha hai

jin ke chaar-qadam par thana hota hai

aaj bichhaDte waqt mujhe malum hua

logon mein ehsas ka KHana hota hai