thoDi der ai saqi bazm mein ujala hai

thoḌī der ai saaqī bazm meñ ujālā hai

jaam ḳhālī hone tak chāñd Dhalne vaalā hai

sub.h kī hasīñ kirneñ naag ban ke Das leñgī

maiñ inheñ samajhtā huuñ maiñ ne un ko paalā hai

bazm-e-nau kī sham.oñ ko ye ḳhabar nahīñ hogī

kis ne zulmat-e-shab ko raushnī meñ Dhālā hai

kis ne ḳhvāb-e-insāñ ke nuqra.ī safīne ko

saḳht-tar talātum kī zad meñ bhī sambhālā hai

log hañs ke kah deñge maiñ ḳharāb-e-sahbā thā

mai-kada ye ḳhush hogā us kā bol-bālā hai

merī fikr kī ḳhushbū qaid ho nahīñ saktī

yuuñ to mere hoñToñ par maslahat kā taalā hai

merī maut ai saaqī irtiqā hai hastī kā

ik 'salām' jaatā hai ek aane vaalā hai

thoDi der ai saqi bazm mein ujala hai

jam KHali hone tak chand Dhalne wala hai

subh ki hasin kirnen nag ban ke Das lengi

main inhen samajhta hun main ne un ko pala hai

bazm-e-nau ki shamon ko ye KHabar nahin hogi

kis ne zulmat-e-shab ko raushni mein Dhaala hai

kis ne KHwab-e-insan ke nuqrai safine ko

saKHt-tar talatum ki zad mein bhi sambhaala hai

log hans ke kah denge main KHarab-e-sahba tha

mai-kada ye KHush hoga us ka bol-baala hai

meri fikr ki KHushbu qaid ho nahin sakti

yun to mere honTon par maslahat ka tala hai

meri maut ai saqi irtiqa hai hasti ka

ek 'salam' jata hai ek aane wala hai