thoDi si income ki KHatir be-chaaron ko mar diya

thoḌī sī income kī ḳhātir be-chāroñ ko maar diyā

chand DākTroñ kī haḌtāloñ ne bīmāroñ ko maar diyā

america meñ T-V-chanel chupke se dar aa.e the

chal nikle to urdu ke sab aḳhbāroñ ko maar diyā

abbā-jī ke business se har beTe ne muñh pher liyā

kursī kī lālach ne kitne lohāroñ ko maar diyā

har taalī par note nichhāvar har lai par london kā ticket

''lālū-khet'' ke qavvāloñ ne fankāroñ ko maar diyā

masnūī bāloñ kā thappaḌ kaafī bhārī hotā hai

us kī zulfoñ ne hil hil ke ruḳhsāroñ ko maar diyā

ek vazīr-e-āzam hai ik bhaa.ī vazīr-e-ālā hai

jamhūrī dāvedāroñ ne haq-dāroñ ko maar diyā

maġhrib kī tahzīb kā hamla ab ke itnā kaarī hai

jeans ko sastā kar ke us ne shalvāroñ ko maar diyā

jitne bhī dil-pheñk the shā.er U-S meñ ābād hue

night-kalboñ kī raunaq ne bechāroñ ko maar diyā

mazdūrī par jaatā huuñ to sher sisakte rahte haiñ

dollar kī ḳhvāhish ne mere fan-pāroñ ko maar diyā

thoDi si income ki KHatir be-chaaron ko mar diya

chand DakTron ki haDtalon ne bimaron ko mar diya

america mein T-V-chanel chupke se dar aae the

chal nikle to urdu ke sab aKHbaron ko mar diya

abba-ji ke business se har beTe ne munh pher liya

kursi ki lalach ne kitne lohaaron ko mar diya

har tali par note nichhawar har lai par london ka ticket

lalu-khet ke qawwalon ne fankaron ko mar diya

masnui baalon ka thappaD kafi bhaari hota hai

us ki zulfon ne hil hil ke ruKHsaron ko mar diya

ek wazir-e-azam hai ek bhai wazir-e-ala hai

jamhuri dawedaron ne haq-daron ko mar diya

maghrib ki tahzib ka hamla ab ke itna kari hai

jeans ko sasta kar ke us ne shalwaron ko mar diya

jitne bhi dil-phenk the shaer U-S mein aabaad hue

night-kalbon ki raunaq ne bechaaron ko mar diya

mazduri par jata hun to sher sisakte rahte hain

dollar ki KHwahish ne mere fan-paron ko mar diya