Thokaren woTon ke badle mein anaDi le gaya

Thokareñ voToñ ke badle meñ anāḌī le gayā

māl-o-daulat sab siyāsat kā khilāḌī le gayā

maġhribī tahzīb kā hamla huā kuchh is tarah

sar se Topī aur phir chehre se dāḌhī le gayā

maiñ thā mahv-e-shauq station ke waiting room meñ

koī apne saath merī rail-gāḌī le gayā

dūsre kheloñ meñ laḌke jūtiyāñ ghiste rahe

saarā paisa ek cricket kā khilāḌī le gayā

Taal kar bahnoñ ko aglī eid ke va.ade pe vo

apnī biivī ke liye resham kī saaḌī le gayā

'mīr'-o-'ġhālib' daftar-e-urdu meñ nange ho ga.e

kauḌiyoñ ke bhaav meñ sab ko kabāḌī le gayā

mahñge injection davā kī goliyāñ aur botaleñ

muḳhtasar sā zaḳhm do din kī dihāḌī le gayā

maiñ khaḌā taktā rahā 'dīdār' hasrat se unheñ

family ko lunch pe jab mārvāḌī le gayā

Thokaren woTon ke badle mein anaDi le gaya

mal-o-daulat sab siyasat ka khilaDi le gaya

maghribi tahzib ka hamla hua kuchh is tarah

sar se Topi aur phir chehre se daDhi le gaya

main tha mahw-e-shauq station ke waiting room mein

koi apne sath meri rail-gaDi le gaya

dusre khelon mein laDke jutiyan ghiste rahe

sara paisa ek cricket ka khilaDi le gaya

Tal kar bahnon ko agli eid ke wade pe wo

apni biwi ke liye resham ki saDi le gaya

'mir'-o-'ghaalib' daftar-e-urdu mein nange ho gae

kauDiyon ke bhaw mein sab ko kabaDi le gaya

mahnge injection dawa ki goliyan aur botalen

muKHtasar sa zaKHm do din ki dihaDi le gaya

main khaDa takta raha 'didar' hasrat se unhen

family ko lunch pe jab marwaDi le gaya