ٹھکرائے ہوئے دل کی یاد آئی تو کیا آئی

ٹھکرائے ہوئے دل کی یاد آئی تو کیا آئی

پھینکا ہوا شیشہ تھا ٹوٹا تو صدا آئی

دن ذوق نوازش سے بیگانہ سہی لیکن

جلوہ ہے نہ شعلہ ہے رات آئی تو کیا آئی

عشرت گہ باطل کی رونق میں کمی کیا ہے

گر باد صبا جا کر اک شمع بجھا آئی

بڑھتی ہوئی بیتابی کچھ روٹھ گئی شاید

جھٹکے ہوئے دامن سے ہاتھوں کو حیا آئی

اٹھتا ہے قدم لیکن رفتار غنودہ ہے

نیند آ گئی رستوں کو منزل کی ہوا آئی

ہے کچھ تو نشورؔ احساں اس عمر رواں کا بھی

اک روز کنارے پر کشتی تو لگا آئی