tir chille pe na aana ki KHata ho jaana

tiir chille pe na aanā ki ḳhatā ho jaanā

lab tak aate hue shikve kā duā ho jaanā

yaad hai us but-e-kāfir kā ḳhafā ho jaanā

aur mirā bhuul ke mā.il-ba-duā ho jaanā

hairat-añgez hai naqqāsh-e-azal ke hāthoñ

merī tasvīr kā tasvīr-e-fanā ho jaanā

dast-e-taqdīr meñ shamshīr-e-jafā denā hai

ḳhud-ba-ḳhud banda-e-taslīm-o-razā ho jaanā

us kī uftād pe ḳhurshīd kī rif.at qurbāñ

jis ko bhāyā tirā naqsh-e-kaf-e-pā ho jaanā

raunaq-e-bazm hai shevan se to shevan hī sahī

ham-safīrān-e-chaman phir na ḳhafā ho jaanā

dāvar-e-hashr kā insāf ishāre un ke

bas yahī hai kisī bande kā ḳhudā ho jaanā

tir chille pe na aana ki KHata ho jaana

lab tak aate hue shikwe ka dua ho jaana

yaad hai us but-e-kafir ka KHafa ho jaana

aur mera bhul ke mail-ba-dua ho jaana

hairat-angez hai naqqash-e-azal ke hathon

meri taswir ka taswir-e-fana ho jaana

dast-e-taqdir mein shamshir-e-jafa dena hai

KHud-ba-KHud banda-e-taslim-o-raza ho jaana

us ki uftad pe KHurshid ki rifat qurban

jis ko bhaya tera naqsh-e-kaf-e-pa ho jaana

raunaq-e-bazm hai shewan se to shewan hi sahi

ham-safiran-e-chaman phir na KHafa ho jaana

dawar-e-hashr ka insaf ishaare un ke

bas yahi hai kisi bande ka KHuda ho jaana