tir-e-nazar ne zulm ko ehsan bana diya

tīr-e-nazar ne zulm ko ehsāñ banā diyā

tarkīb-e-dil ne dard ko darmāñ banā diyā

sad shukr aaj ho ga.ī takmīl ishq kī

apne ko ḳhāk-e-kūcha-e-jānāñ banā diyā

kotāhī koī dast-e-junūñ se nahīñ huī

dāman ko ham-kanār-e-girebāñ banā diyā

chhoḌī hai jab se maiñ ne salāmat-ravī kī chaal

dushvāriyoñ ko raah kī āsāñ banā diyā

ai mish.al-e-ummīd ye ehsān kam nahīñ

tārīk shab ko tū ne daraḳhshāñ banā diyā

husn-āfrīñ huā hai tasavvur jamāl kā

dil ko havā-e-gul ne gulistāñ banā diyā

zohd aur ittiqā pe mujhe apne naaz thā

ḳhud maiñ ne tujh ko dushman-e-īmāñ banā diyā

ā.īna-e-jamāl ko dekhūñgā kis tarah

us ne to pahle hī mujhe hairāñ banā diyā

vo imtiyāz-e-husn hai ma.anī o lafz kā

'vahshat' ko jis ne 'ġhālib'-e-daurāñ banā diyā

tir-e-nazar ne zulm ko ehsan bana diya

tarkib-e-dil ne dard ko darman bana diya

sad shukr aaj ho gai takmil ishq ki

apne ko KHak-e-kucha-e-jaanan bana diya

kotahi koi dast-e-junun se nahin hui

daman ko ham-kanar-e-gireban bana diya

chhoDi hai jab se main ne salamat-rawi ki chaal

dushwariyon ko rah ki aasan bana diya

ai mishal-e-ummid ye ehsan kam nahin

tarik shab ko tu ne daraKHshan bana diya

husn-afrin hua hai tasawwur jamal ka

dil ko hawa-e-gul ne gulistan bana diya

zohd aur ittiqa pe mujhe apne naz tha

KHud main ne tujh ko dushman-e-iman bana diya

aaina-e-jamal ko dekhunga kis tarah

us ne to pahle hi mujhe hairan bana diya

wo imtiyaz-e-husn hai mani o lafz ka

'wahshat' ko jis ne 'ghaalib'-e-dauran bana diya