tir KHatm hain to kya hath mein kaman rakhna

tiir ḳhatm haiñ to kyā haath meñ kamāñ rakhnā

is muhīb jañgal meñ hausla javāñ rakhnā

kyā patā havā.eñ kab mehrbān ho jaa.eñ

pāniyoñ meñ jab utro saath bādbāñ rakhnā

ranjisheñ bhulā denā fāsle miTā denā

ik mahīn sā parda phir bhī darmiyāñ rakhnā

ham bhī hoñT sī leñge jī sake to jī leñge

kyā koī zarūrī hai boltī zabāñ rakhnā

ye ghaḌī to aa.ī thī yuuñ hī sargirānī thī

ab fuzūl lagtā hai koī sā.ebāñ rakhnā

lahr lahr bikhrī hai qahr qahr dariyā meñ

be-javāz lagtā hai sa.ī-e-rā.egāñ rakhnā

dūsroñ kī zid huuñ maiñ kitnā munfarid huuñ maiñ

ye bhī kyā ki sab jaisā sar pe āsmāñ rakhnā

tir KHatm hain to kya hath mein kaman rakhna

is muhib jangal mein hausla jawan rakhna

kya pata hawaen kab mehrban ho jaen

paniyon mein jab utro sath baadban rakhna

ranjishen bhula dena fasle miTa dena

ek mahin sa parda phir bhi darmiyan rakhna

hum bhi honT si lenge ji sake to ji lenge

kya koi zaruri hai bolti zaban rakhna

ye ghaDi to aai thi yun hi sargirani thi

ab fuzul lagta hai koi saeban rakhna

lahr lahr bikhri hai qahr qahr dariya mein

be-jawaz lagta hai sai-e-raegan rakhna

dusron ki zid hun main kitna munfarid hun main

ye bhi kya ki sab jaisa sar pe aasman rakhna