tir o kaman, KHanjar o talwar ban gae

tiir o kamān, ḳhanjar o talvār ban ga.e

dushman milā to haath bhī hathiyār ban ga.e

lafzoñ ke kaise kaise ma.ānī badal ga.e

kirdār-kush bhī sāhab-e-kirdār ban ga.e

jab se koī usūl-e-tijārat nahīñ rahā

bāzriyoñ ke naam pe bāzār ban ga.e

qadġhan ke bāvajūd kahāñ aa gayā huuñ maiñ

darvāze mere sāmne dīvār ban ga.e

us kī zabāñ pe harf the unvān kī tarah

afsāne saikḌoñ pas-e-iz.hār ban ga.e

is qāfile meñ gard barābar thī jin kī zaat

vāpas hue to qāfila-sālār ban ga.e

ḳhat khīñchte hue koī bachcha baḌā huā

kal ke ḳhutūt aaj ke shāhkār ban ga.e

tir o kaman, KHanjar o talwar ban gae

dushman mila to hath bhi hathiyar ban gae

lafzon ke kaise kaise maani badal gae

kirdar-kush bhi sahab-e-kirdar ban gae

jab se koi usul-e-tijarat nahin raha

bazriyon ke nam pe bazar ban gae

qadghan ke bawajud kahan aa gaya hun main

darwaze mere samne diwar ban gae

us ki zaban pe harf the unwan ki tarah

afsane saikDon pas-e-izhaar ban gae

is qafile mein gard barabar thi jin ki zat

wapas hue to qafila-salar ban gae

KHat khinchte hue koi bachcha baDa hua

kal ke KHutut aaj ke shahkar ban gae