tir pahlu mein nahin ai rufaqa-e-parwaz

tiir pahlū meñ nahīñ ai rufaqā-e-parvāz

tā.ir-e-jān ke ye par haiñ barā.e parvāz

yuuñ to par-band huuñ par yaar paroñ par mere

jo girah terī hai so uqda-kushā-e-parvāz

ek parvāz kī tāqat nahīñ us jā se mujhe

aur jo hukm ho sayyād sivā.e parvāz

dekhiyo naama na laayā ho kabūtar is kā

kuchh mire kaan meñ aatī hai sadā-e-parvāz

be-par-o-bālī pe ġhash huuñ ki ye har dam hai rafīq

thī par-o-bāl hī tak ham se vafā-e-parvāz

apne nazdīk to is daam meñ phañs kar sayyād

kisī kam-baḳht ko hovegā havā-e-parvāz

to bhī us tak hai rasā.ī mujhe 'ehsāñ' dushvār

daam luuñ gar par-e-jibrīl barā-e-parvāz

tir pahlu mein nahin ai rufaqa-e-parwaz

tair-e-jaan ke ye par hain barae parwaz

yun to par-band hun par yar paron par mere

jo girah teri hai so uqda-kusha-e-parwaz

ek parwaz ki taqat nahin us ja se mujhe

aur jo hukm ho sayyaad siwae parwaz

dekhiyo nama na laya ho kabutar is ka

kuchh mere kan mein aati hai sada-e-parwaz

be-par-o-baali pe ghash hun ki ye har dam hai rafiq

thi par-o-baal hi tak hum se wafa-e-parwaz

apne nazdik to is dam mein phans kar sayyaad

kisi kam-baKHt ko howega hawa-e-parwaz

to bhi us tak hai rasai mujhe 'ehsan' dushwar

dam lun gar par-e-jibril bara-e-parwaz