tir wo tir nahin jo na jigar tak pahunche

tiir vo tiir nahīñ jo na jigar tak pahuñche

teġh vo teġh nahīñ hai jo na sar tak pahuñche

vo duā kyā hai duā jo na asar tak pahuñche

jalva vo jalva hai kyā jo na nazar tak pahuñche

luT ga.ī hosh kī duniyā tire dīvānoñ kī

khul ke gesū jo tire terī kamar tak pahuñche

jazb-e-kāmil ho to ho jaa.e nazāra āsāñ

chashm-e-dil vā ho to jalva bhī nazar tak pahuñche

qaid meñ rakh ke bhī ai vaa.e tasallī na huī

haath sayyād ke mujh zaar ke par tak pahuñche

ye umaḌtā huā sailāb abhī ruk jaa.e

terā dāman jo mire dīda-e-tar tak pahuñche

phir nigāhoñ meñ koī apnī burā hī na rahe

aadmī apne agar aib-o-hunar tak pahuñche

zindagī ishq meñ miltī hai miTā kar ḳhud ko

daana jab ḳhaak meñ mil jaa.e samar tak pahuñche

qurb sāhil kā unheñ hogā na 'jauhar' hāsil

jo safīne na abhī mauj bhañvar tak pahuñche

tir wo tir nahin jo na jigar tak pahunche

tegh wo tegh nahin hai jo na sar tak pahunche

wo dua kya hai dua jo na asar tak pahunche

jalwa wo jalwa hai kya jo na nazar tak pahunche

luT gai hosh ki duniya tere diwanon ki

khul ke gesu jo tere teri kamar tak pahunche

jazb-e-kaamil ho to ho jae nazara aasan

chashm-e-dil wa ho to jalwa bhi nazar tak pahunche

qaid mein rakh ke bhi ai wae tasalli na hui

hath sayyaad ke mujh zar ke par tak pahunche

ye umaDta hua sailab abhi ruk jae

tera daman jo mere dida-e-tar tak pahunche

phir nigahon mein koi apni bura hi na rahe

aadmi apne agar aib-o-hunar tak pahunche

zindagi ishq mein milti hai miTa kar KHud ko

dana jab KHak mein mil jae samar tak pahunche

qurb sahil ka unhen hoga na 'jauhar' hasil

jo safine na abhi mauj bhanwar tak pahunche