تیرہ شبی کا دور کہیں مختصر تو ہو

تیرہ شبی کا دور کہیں مختصر تو ہو

جاگیں الم نصیب نمود سحر تو ہو

راہیں نئی ہوں راہ کے منظر نئے مگر

پچھلے سفر کی آنکھوں میں گرد سفر تو ہو

جو اک کرن کو سونپ دے ساری متاع شب

ایسا کوئی مزاج شناس سحر تو ہو

ساحل کے اس سکوت سے تنگ آ چکے ہیں ہم

موجوں کے پیچ و خم میں کوئی رہ گزر تو ہو

بیتے دنوں کی یاد جگا دے کبھی کبھی

اس شہر آرزو میں اک ایسا کھنڈر تو ہو

یہ منزل حیات کے پر ہول راستے

مانا وہ راہ بر ہے مگر معتبر تو ہو