tirgi ho ki ho tanwir lahu mangegi

tīrgī ho ki ho tanvīr lahū māñgegī

har na.e daur kī ta.amīr lahū māñgegī

is se achchhā hai ki ḳhvāboñ kā bharosa na karo

ḳhvāb dekhoge to ta.abīr lahū māñgegī

dasht-e-vahshat meñ to us vaqt mazā aa.egā

jab mire paañv kī zanjīr lahū māñgegī

tum mire sāmne ab jang kī bāteñ na karo

nyaam se niklī to shamshīr lahū māñgegī

maiñ ye hī sochtā rahtā huuñ shab-o-roz 'aḳhtar'

kab talak vādī-e-kashmīr lahu māñgegī

tirgi ho ki ho tanwir lahu mangegi

har nae daur ki tamir lahu mangegi

is se achchha hai ki KHwabon ka bharosa na karo

KHwab dekhoge to tabir lahu mangegi

dasht-e-wahshat mein to us waqt maza aaega

jab mere panw ki zanjir lahu mangegi

tum mere samne ab jang ki baaten na karo

nyam se nikli to shamshir lahu mangegi

main ye hi sochta rahta hun shab-o-roz 'aKHtar'

kab talak wadi-e-kashmir lahu mangegi