طلسم خواب بھی ایسا کہ ٹوٹتا ہی نہیں

طلسم خواب بھی ایسا کہ ٹوٹتا ہی نہیں

غنودہ ذہن کوئی بات سوچتا ہی نہیں

وہ میرے دل کی کراہیں بھی سن رہا ہے مگر

خفا ہے مجھ سے کچھ ایسا کہ بولتا ہی نہیں

نہ بن سکی دل خود سر سے آج تک میری

میں کوئی بات کہوں میری مانتا ہی نہیں

اس آدمی کو سمجھ لو ہے ظرف سے خالی

کسی کو اپنے مقابل جو تولتا ہی نہیں

خود اپنے گھر جسے حاصل ہے زندگی کا سکوں

وہ در بدر کی کبھی خاک چھانتا ہی نہیں

ترے بغیر بھی جینا پڑا تو جی لوں گا

میں ایسی بات کبھی دل میں سوچتا ہی نہیں

طلوع ہوتا ہے جو مطلع فصاحت سے

شعور و فکر کا سورج وہ ڈوبتا ہی نہیں