tilism-e-KHwab bhi aisa ki TuTta hi nahin

tilism-e-ḳhvāb bhī aisā ki TūTtā hī nahīñ

ġhunūda zehn koī baat sochtā hī nahīñ

vo mere dil kī karāheñ bhī sun rahā hai magar

ḳhafā hai mujh se kuchh aisā ki boltā hī nahīñ

na ban sakī dil-e-ḳhud-sar se aaj tak merī

maiñ koī baat kahūñ merī māntā hī nahīñ

us aadmī ko samajh lo hai zarf se ḳhālī

kisī ko apne muqābil jo toltā hī nahīñ

ḳhud apne ghar jise hāsil hai zindagī kā sukūñ

vo dar-ba-dar kī kabhī ḳhaak chhāntā hī nahīñ

tire baġhair bhī jiinā paḌā to jī lūñgā

maiñ aisī baat kabhī dil meñ sochtā hī nahīñ

tulūa hotā hai jo matl.a-e-fasāhat se

shu.ūr-o-fikr kā sūraj vo Dūbtā hī nahīñ

tilism-e-KHwab bhi aisa ki TuTta hi nahin

ghunuda zehn koi baat sochta hi nahin

wo mere dil ki karahen bhi sun raha hai magar

KHafa hai mujh se kuchh aisa ki bolta hi nahin

na ban saki dil-e-KHud-sar se aaj tak meri

main koi baat kahun meri manta hi nahin

us aadmi ko samajh lo hai zarf se KHali

kisi ko apne muqabil jo tolta hi nahin

KHud apne ghar jise hasil hai zindagi ka sukun

wo dar-ba-dar ki kabhi KHak chhanta hi nahin

tere baghair bhi jina paDa to ji lunga

main aisi baat kabhi dil mein sochta hi nahin

tulua hota hai jo matla-e-fasahat se

shuur-o-fikr ka suraj wo Dubta hi nahin