tilism-e-KHwab se mera badan patthar nahin hota

tilism-e-ḳhvāb se merā badan patthar nahīñ hotā

mirī jab aañkh khultī hai maiñ bistar par nahīñ hotā

yaqīñ aatā nahīñ to mujh ko yā mahtāb ko dekho

ki raat us kī bhī kaT jaatī hai jis kā ghar nahīñ hotā

jidhar dekhūñ udhar hī dekhtā rahtā huuñ pahroñ tak

mujhe atrāf kā ḳhālī varaq azbar nahīñ hotā

khajūreñ aur paanī le ke aage baḌhtā jaatā huuñ

magar ye koh-e-imkāñ hai ki mujh se sar nahīñ hotā

kam-az-kam mujh se duniyā ko shikāyat to nahīñ hogī

maiñ is jaisā hī ban jā.ūñ agar behtar nahīñ hotā

javāz apnā banātā huuñ kisī nādīda ḳhitte meñ

jahāñ merī zarūrat ho vahāñ aksar nahīñ hotā

bahātā huuñ kahīñ apne sifāl-e-be-murkkab ko

maiñ girye ke dinoñ meñ chāk-e-duniyā par nahīñ hotā

gilā to ḳhair kyā hogā bas itnā tum se kahnā hai

tumhārī umr meñ koī sitam-parvar nahīñ hotā

to phir yuuñ hai ki maiñ ne us ko chāhā hī nahīñ 'tābish'

agar us kī shabāhat kā gumāñ mujh par nahīñ hotā

tilism-e-KHwab se mera badan patthar nahin hota

meri jab aankh khulti hai main bistar par nahin hota

yaqin aata nahin to mujh ko ya mahtab ko dekho

ki raat us ki bhi kaT jati hai jis ka ghar nahin hota

jidhar dekhun udhar hi dekhta rahta hun pahron tak

mujhe atraf ka KHali waraq azbar nahin hota

khajuren aur pani le ke aage baDhta jata hun

magar ye koh-e-imkan hai ki mujh se sar nahin hota

kam-az-kam mujh se duniya ko shikayat to nahin hogi

main is jaisa hi ban jaun agar behtar nahin hota

jawaz apna banata hun kisi nadida KHitte mein

jahan meri zarurat ho wahan aksar nahin hota

bahata hun kahin apne sifal-e-be-murkkab ko

main girye ke dinon mein chaak-e-duniya par nahin hota

gila to KHair kya hoga bas itna tum se kahna hai

tumhaari umr mein koi sitam-parwar nahin hota

to phir yun hai ki main ne us ko chaha hi nahin 'tabish'

agar us ki shabahat ka guman mujh par nahin hota