tilism-e-nashsha-e-duniya bhi aaj KHatm hua

tilism-e-nashsha-e-duniyā bhī aaj ḳhatm huā

jo ho rahā thā tamāsha bhī aaj ḳhatm huā

milā jo us se to us ne bhī pher lī nazreñ

chalo ye āḳhirī rishta bhī aaj ḳhatm huā

girā zamīñ pe sitāra ye kis ke mizhgāñ se

ye kis ke dil kā sahārā bhī aaj ḳhatm huā

mile jo barsoñ ke pyāse to aise ek hue

ki ehtiyāt kā pahra bhī aaj ḳhatm huā

jo rafta-rafta huī ḳhatm vaz-e-derīna

mohabbatoñ kā salīqa bhī aaj ḳhatm huā

tumhārī yaad se samjhauta kar liyā maiñ ne

ḳhayāl-e-va.ada-e-fardā bhī aaj ḳhatm huā

na jaane kaise tujhe apnā maan baiThā thā

mirī nazar kā vo dhoka bhī aaj ḳhatm huā

tire taġhāful-e-paiham ne kar diyā māyūs

mirā vo zauq-e-tamannā bhī aaj ḳhatm huā

vo dil bhī le ga.e pahlū se uTh ke ai 'tābish'

ye roz roz kā jhagḌā bhī aaj ḳhatm huā

tilism-e-nashsha-e-duniya bhi aaj KHatm hua

jo ho raha tha tamasha bhi aaj KHatm hua

mila jo us se to us ne bhi pher li nazren

chalo ye aaKHiri rishta bhi aaj KHatm hua

gira zamin pe sitara ye kis ke mizhgan se

ye kis ke dil ka sahaara bhi aaj KHatm hua

mile jo barson ke pyase to aise ek hue

ki ehtiyat ka pahra bhi aaj KHatm hua

jo rafta-rafta hui KHatm waz-e-derina

mohabbaton ka saliqa bhi aaj KHatm hua

tumhaari yaad se samjhauta kar liya main ne

KHayal-e-wada-e-farda bhi aaj KHatm hua

na jaane kaise tujhe apna man baiTha tha

meri nazar ka wo dhoka bhi aaj KHatm hua

tere taghaful-e-paiham ne kar diya mayus

mera wo zauq-e-tamanna bhi aaj KHatm hua

wo dil bhi le gae pahlu se uTh ke ai 'tabish'

ye roz roz ka jhagDa bhi aaj KHatm hua