tera be-muddaa mange dua kya

tirā be-mudda.ā māñge duā kyā

maraz hai tandurustī meñ davā kyā

kaheñ kyā kyā kiyā hai ham ne kyā kyā

tujhe ai bevafā qadr-e-vafā kyā

tabassum ho javāb-e-mudda.ā kyā

kahā kyā aap ne maiñ ne sunā kyā

kaho āḳhir zarā maiñ bhī to sun luuñ

mirī nisbat sunā hai tum ne kyā kyā

tumhārī mehrbānī hai to sab hai

mirā armān merā mudda.ā kyā

na dekheñ vo to apnā girya be-sūd

na pūchheñ vo to apnā mudda.ā kyā

chalā tū bhī jo ai dil lene vaale

hamāre paas phir baaqī rahā kyā

adā.eñ tum ko baḳhshīñ ham ko āñkheñ

karegā aur bandoñ se ḳhudā kyā

jo mujh ko aap hī dar se uThā deñ

koī rakkhe kisī kā aasrā kyā

samajhte ho jo apne-āp ko tum

use samjhegā koī dūsrā kyā

khilāte ho qasam zabt-e-fuġhāñ par

zarā socho maraz kyā hai davā kyā

mire ghar ko tum apnā ghar na samjho

to aisī mehmānī kā mazā kyā

safī' ḳhud biinī Thahre jin kā sheva

nazar aa.egā un ko dūsrā kyā

tera be-muddaa mange dua kya

maraz hai tandurusti mein dawa kya

kahen kya kya kiya hai hum ne kya kya

tujhe ai bewafa qadr-e-wafa kya

tabassum ho jawab-e-muddaa kya

kaha kya aap ne main ne suna kya

kaho aaKHir zara main bhi to sun lun

meri nisbat suna hai tum ne kya kya

tumhaari mehrbani hai to sab hai

mera arman mera muddaa kya

na dekhen wo to apna girya be-sud

na puchhen wo to apna muddaa kya

chala tu bhi jo ai dil lene wale

hamare pas phir baqi raha kya

adaen tum ko baKHshin hum ko aankhen

karega aur bandon se KHuda kya

jo mujh ko aap hi dar se uTha den

koi rakkhe kisi ka aasra kya

samajhte ho jo apne-ap ko tum

use samjhega koi dusra kya

khilate ho qasam zabt-e-fughan par

zara socho maraz kya hai dawa kya

mere ghar ko tum apna ghar na samjho

to aisi mehmani ka maza kya

safi' KHud bini Thahre jin ka shewa

nazar aaega un ko dusra kya