ترا بیمار ایسا ناتواں ہے

ترا بیمار ایسا ناتواں ہے

کہ تن میں جان بھی بار گراں ہے

زبس ہے جوش داغ و بحر گریہ

سمندر اور مچھلی تو اماں ہے

گرا دے گا تڑا کر توسن عمر

یہی تار نفس کی گر عناں ہے

ورق ہیں رشک اوراق گلستاں

مرا دیواں برنگ بوستاں ہے

خریدار آ کے لے جاتے ہیں حسرت

مری بازار میں تختہ دکاں ہے

رقم کرتا جو ہوں وصف سر زلف

زبان مار خامہ کی زباں ہے

نہ پروانے کو اتنا بھی جلا شمع

یہ کوئی دم کا تیرا مہماں ہے

چراغ داغ دل گویا ہے خاموش

مرے گھر میں یہ آہوں کا دھواں ہے

اٹھوں دنیا سے میں دیوانہ کیوں کر

نفس مانند زنجیر گراں ہے

سنا ہے نام پر دیکھا نہیں عرشؔ

مرے نزدیک عنقا قدرداں ہے