tera firaq muqaddar samajh liya humne

tirā firāq muqaddar samajh liyā ham ne

ab apne-āp ko patthar samajh liyā ham ne

tumhārī yaad ke palkoñ pe ashk raushan the

añdherī shab ko munavvar samajh liyā ham ne

ye ḳhud-farebī nahīñ hai to aur kyā kahiye

har ek saa.e ko paikar samajh liyā ham ne

sipurd kar diye saare huqūq rahzan ko

ye kis zalīl ko rahbar samajh liyā ham ne

tamām jism thakāvaT se chuur chuur huā

tab is zamīn ko bistar samajh liyā ham ne

hamārī bhuul thī qad meñ bahut jo chhoTe the

unheñ bhī qad ke barābar samajh liyā ham ne

vo jis ne jaan aziyyat meñ Daal dī 'mashkūr'

use hī jaan se baḌh kar samajh liyā ham ne

tera firaq muqaddar samajh liya hum ne

ab apne-ap ko patthar samajh liya hum ne

tumhaari yaad ke palkon pe ashk raushan the

andheri shab ko munawwar samajh liya hum ne

ye KHud-farebi nahin hai to aur kya kahiye

har ek sae ko paikar samajh liya hum ne

sipurd kar diye sare huquq rahzan ko

ye kis zalil ko rahbar samajh liya hum ne

tamam jism thakawaT se chur chur hua

tab is zamin ko bistar samajh liya hum ne

hamari bhul thi qad mein bahut jo chhoTe the

unhen bhi qad ke barabar samajh liya hum ne

wo jis ne jaan aziyyat mein Dal di 'mashkur'

use hi jaan se baDh kar samajh liya hum ne